Rundunar ‘yan sanda ta Zone 2 a jihar Legas ta tabbatar da cafke wasu ‘yan kungiyar asiri guda biyu da ke da alaka da kutse a asusun banki kasa da 1000 a Najeriya.
Kakakin rundunar ‘yan sandan jihar, SP Hauwa Idris-Adamu, a wata sanarwa da ta fitar a ranar Talata, ta ce wadanda ake zargin sun kware wajen yin kutse a bankunan cikin gida, an kama su ne a maboyar su da ke Ijebu Ode a jihar Ogun, biyo bayan wani kara da bankin United Bank for Africa ya shigar. .
Idris-Adamu ya bayyana sunayen wadanda ake zargin Yusuf Ademola mai shekaru 40 da kuma Adesina Abiodun mai shekaru 50, ya kara da cewa ana kokarin kama wasu da ake alakantawa da aikata laifin.
Sanarwar ta ci gaba da cewa, “A ranar 8 ga Mayu, 2023, bankin United Bank for Africa ya mika takardar koke ga mataimakin sufeto Janar na ‘yan sandan kasar cewa akwai wasu kungiyoyin da suka kware wajen zamba ta intanet na bankuna daban-daban a Najeriya, musamman ma United Bank for Africa. inda suke yin kutse cikin asusun kwastomomi da kuma kwashe kudadensu.
“Wadanda ake zargin sun amsa laifin da suka aikata cewa suna da kungiyoyi da dama a duk fadin Najeriya kuma suna amfani da manhaja wajen yin kutse cikin asusun kwastomominsu da fitar da kudadensu ba tare da an gano su daga bankin da suke so ba. Sai dai tsarin da wadannan ’yan damfara ke yi shi ne su samu lambar wayar abokin ciniki ta BVN da kuma sanarwar banki domin a samu saukin tura kudin.”
Idris-Adamu ya bayyana cewa, “an yi kutse tare da damfara a asusun kwastomomi sama da 1000 a fadin kasar,” ya kara da cewa binciken da aka gudanar ya nuna cewa an zabo ‘yan kungiyar ne daga sassan kasar nan.
Adamu ta kara da cewa “A cikin wucin gadi, binciken yana ci gaba da gudana kuma nan ba da jimawa ba za a gurfanar da wadanda ake tuhuma a gaban kotu bayan kammala binciken
Daga Fatima Abubakar.
