Mutane da dama da suka hada da ‘yan majalisar dokokin jihar Binuwai biyu sun jikkata a lokacin da ayarin motocin gwamnan jihar Samuel Ortom suka yi hatsari.
Hatsarin ya afku ne da safiyar Juma’a lokacin da gwamnan da magoya bayan jam’iyyar PDP ke tattaki zuwa unguwar Utokon da ke karamar hukumar Ado a ci gaba da yakin neman zaben gwamnan jam’iyyar.
An rawaito cewa lamarin ya faru ne a lokacin da direban wata motar bas cike da magoya bayan jam’iyyar PDP ya taka motoci uku; Jeep, da motar tsaro, da wata bas a cikin ayarin.
Mutane da dama ciki har da ‘yan majalisar dokokin jihar masu wakiltar Guma da Kwande ta yamma a majalisar dokokin jihar sun jikkata.
Lamarin da ya faru da misalin karfe 10:50 na safiyar Juma’a ya kuma shafi wasu motoci.
Motocin da ke cikin ayarin sun hada da mataimakin gwamnan jihar, Engr Benson Abounu; Sanata Abba Moro; ‘Yan majalisar wakilai, daga gundumar Benuwe ta Kudu; da sauran manyan jami’an gwamnati da na jam’iyyar a jihar.
A halin da ake ciki, motar daukar marasa lafiya da ke cikin ayarin motocin ta kwashe wadanda suka jikkata zuwa asibiti yayin da sauran suka ci gaba da tafiya.
Daga Fatima Abubakar 
