Kungiyar malaman kwalejojin ilimi (COEASU) ta umurci mambobin kungiyar su rika zuwa aiki sau biyu a mako sakamakon karin farashin man fetur da ake samu a halin yanzu sakamakon cire tallafin mai.
Shugaban kungiyar, Smart Olugbeko, a wata sanarwa da ya fitar ranar Laraba, ya ce mambobin kungiyar ba za su iya ci gaba da rayuwa a kan mafi karancin albashin ma’aikata ba.
Ya ce umarnin ya biyo bayan babban taron kungiyar da aka yi a ranar Talata, 18 ga Yuli, 2023.
Olugbeko ya ce mambobin kungiyar ba za su koma bakin aikinsu ba har sai gwamnatin tarayya ta amince da bukatar COEASU na karin kashi 200 na albashi.
“Shugaban kungiyar mu ta kasa a taronta na musamman da ta gudanar a ranar Talata 18 ga watan Yuli 2023 ta amince da umurtar mambobinta da su tafi aiki kwana biyu a mako har sai gwamnatin tarayya ta biya bukatar ta na karin albashin kashi 200 cikin 100 saboda wahala da mambobin kungiyar ke fuskanta wajen zuwa aiki a sakamakon karin farashin man fetur,” a wani bangare na sanarwar.
“Aikin cire tallafin man fetur da Gwamnatin Tarayya ta yi watanni biyu da suka gabata ya kara farashin litar man fetur da kashi 250%.
“Hakan ya kara tabarbarewar hauhawar farashin kayayyaki, kayan abinci, da sauran muhimman kayayyaki da kuma talauta al’ummar Najeriya. Ma’aikata, ciki har da ma’aikatan Kwalejojin Ilimi, sun ci gaba da yin imani da gwamnati kuma sun zabi jure wahalhalun da ba za a iya mantawa da su ba suna tunanin zai kasance na wani lokaci ne kawai kamar yadda gwamnati ta yi alkawarin fitar da matakan kwantar da tarzoma da suka hada da karin albashi.
“Kaicho! Yayin da karfin da muke da shi na dorewar ya riga ya ƙare, farashin man fetur ya ƙara tashi zuwa N650 kowace lita. Yanzu haka, shugabannin kungiyar sun cika da korafe-korafen da mambobin kungiyar ke yi na cewa ba za su iya zuwa aiki ba sakamakon karin farashin man fetur da kuma tsadar sufuri.”
Kungiyar ta bayar da wannan umarni ne kimanin sa’o’i 24 bayan farashin litar man fetur a gidajen mai a fadin kasar nan, ciki har da na Kamfanin Man Fetur na Najeriya (NNPCL) ya kai N617.
Firdausi Musa Dantsoho
