A cewar mai magana da yawun rundunar ‘yan sandan babban birnin tarayya, DSP Josephine Adeh, ‘yan sandan sun yi gaggawar shiga tsakani ne ya biyo bayan kirar gaggawa da aka yi wa ofishin ‘yan sanda na Kabusa kan wani harin fashi da makami da aka kai a unguwar ECWA 2 da ke kauyen Kabusa.
Wasu daga cikin abubuwan da aka gano a wurin sun hada da bindigar Barreta daya, harsashi mai tsawon mita 9, da gatari guda biyu, wayar hannu daya, da kuma azurfa daya.
“Da samun rahoton, jami’an ‘yan sanda sun yi gaggawar zuwa wurin tare da hadin gwiwar jama’ar yankin. ‘Yan ta’addan da suka ga tawagar ‘yan sandan, sai suka bude musu wuta, sannan kuma aka yi artabu da bindiga. Sai dai kuma harbin da ‘yan sandan suka yi ya kai ga kashe daya daga cikin ‘yan fashi da makami, yayin da wasu kuma suka samu raunuka daga harbe- harben bindiga, inda suka arce daga yankin. Ana ci gaba da kokarin kamo ‘yan kungiyar da suka gudu.
“Mutane biyu da ‘yan ta’addan suka raunata, an kai su asibiti nan take, inda aka yi musu magani aka sallame su. Likitan da ke bakin aiki ya tabbatar da mutuwar dan fashin.”
A halin da ake ciki, kwamishinan ‘yan sanda, CP Sadiq Abubakar, ya yabawa mazauna yankin bisa gaggauwa da sanar da su da kuma tallafa wa ‘yan sanda. Ya ba da tabbacin cewa, yayin da ake ci gaba da kokarin hana duk wata barazana ga lafiyar jama’a, za a fuskanci irin wadannan laifuffukan yadda ya kamata kuma a gaggauta dakile su.
Don haka ana kira ga jama’a da su kiyaye tare da kai rahoto ga ‘yan sanda ta wadannan lambobin gaggawa kamar haka: 08032003913, 08061581938, 07057337653, da 08028940883,
Daga Fatima Abubakar.
