Da yake kudurin fatattakar ‘yan fashin kan iyaka da kuma kawar da barazanar ‘yan fashin da suka addabi yankin, Ministan babban birnin tarayya, Nyesom Wike ya kafa rundunar hadin gwiwa guda biyu da ta kunshi dukkanin hukumomin tsaro a yankin.
‘Yan fashin wayanda suke anfani da motocin daukan fasinja domin yi musu fashi ba su ji ba ba su gani ba tare da yi musu lahani, a wasu lokutan kuma su kashe su.
Kwamishinan ‘yan sanda na babban birnin tarayya, Haruna Garba ne ya bayyana hakan a yammacin ranar Juma’a a Abuja a karshen taron kwamitin tsaro na babban birnin tarayya Abuja wanda Wike ya jagoranta.
Da yake jawabi ga manema labarai, Garba wanda babban kwamandan hukumar tsaro ta farin kaya ta NSCDC na babban birnin tarayya Abuja, Olusola Odumosu da sauran hafsoshin tsaro da na leken asiri, ya ce; “Taron kwamitin tsaro na babban birnin tarayya Abuja wanda ministan babban birnin tarayya, Nyesom Wike ya jagoranta a yau, inda aka tattauna hanyoyin da za a bi wajen kawar da masu aikata laifuka a cikin babban birnin tarayya Abuja, da dakatar da aikata laifukan kan iyaka da kuma dakile barazanar wata dama.
“Saboda haka, an kuduri aniyar kafa rundunar hadin gwiwa ta dukkan hukumomin tsaro a kan barazanar da ta samu.
“Har ila yau, za a kafa wata rundunar hadin gwiwa da ke yaki da laifuffukan da ke kan iyaka don magance matsalar ‘yan fashi da makami, masu garkuwa da mutane da duk wani nau’in laifuka a babban birnin tarayya Abuja.
Kwamishinan ya ce,”Muna so mu tabbatar wa mazauna yankin kudurinmu na dakile duk wani nau’in laifuka a yankin”.
“FCT ita ce zuciyar kasar, inda mutane da yawa ke shigowa kuma ba su da matsuguni ko takamaimen kasuwanci a nan. Suna ƙarewa a ƙarƙashin gadoji har ma a wasu wuraren aikin kanikanci.
“Abin da muke yi shi ne kai farmaki, kuma mun kai samame a wurare daban-daban don dole ne mu cire ƙanƙara daga cikin hatsi domin mazauna yankin su kwana da idanun su a rufe.”
Daga Fatima Abubakar. 
