Juyin Mulki: Sojojin Burkina Faso sun hambarar da Paul Henri Damiba

0
19

Kaftin din sojojin Burkina Faso Ibrahim Traore ya sanar a daren jiya Juma’a cewa sojojin kasar sun kwace mulki tare da hambarar da shugaban sojojin kasar Paul Henri Damiba wanda shi kansa ke da madafun iko a wani juyin mulki watanni takwas kacal da suka gabata.

Traore ya ce a cikin wata sanarwa da ya fitar, gungun jami’an da suka taimaka wa Damiba ya karbe mulki a watan Janairu, sun yanke shawarar cewa, shugaban ba zai iya tabbatar da tsaron kasar nan ba, wanda ke fama da tashe tashen hankula na wata kungiya.

 

Sanarwar mai dauke da sa hannun Traore an karanta ta a gidan talabijin na kasar da yammacin Juma’a ta hannun wani jami’in soja.

“Sakamakon tabarbarewar al’amura, mun yi ƙoƙari sau da yawa don ganin Damiba ya sake mayar da hankali kan batun tsaro,” in ji sanarwar Traore.

 

Lokacin da Damiba ya hau kan karagar mulki a watan Janairu, bayan hambarar da shugaba Roch Kabore, ya yi alkawarin samar da tsaro a kasar. Sai dai ana ci gaba da samun tashe-tashen hankula a kasar, kuma tashe-tashen hankula na kara karuwa a ‘yan watannin nan.

Damiba dai ya dawo ne daga jawabin da ya yi a taron Majalisar Dinkin Duniya a birnin New York.

 

Sabbin shugabannin sojojin kasar sun ce suna rusa majalisar dokokin kasar.

Sun kuma sanar da cewa an rufe iyakokin Burkina Faso kuma za a kafa dokar hana fita daga karfe 9 na dare. zuwa 5 na safe

 

Kafin sanarwar da yammacin Juma’a, sojoji a Burkina Faso sun toshe tituna a Ouagadougou babban birnin kasar, kuma gidan talabijin na gwamnati ya daina yada shirye-shirye.

Da misalin karfe 4:30 na safe. Na ranar Juma’a an yi ta harbe-harbe a Ouagadougou da ke kusa da Camp Baba Sy, inda Damiba ya ke zama. Shaidu sun ce ana kuma ji karar harbe-harbe daga Kosyam, inda fadar shugaban kasa take.

 

Wakilin Muryar Amurka da ya je tsakiyar birnin ranar Juma’a ya gano wani shingen sojoji a Boulevard Charles de Gaulle. Da yawa daga cikin sojojin na sanye da abin rufe fuska kuma ba sa son yin magana, yayin da ‘yan sandan yankin suka ce ba su san abin da ke faruwa ba.

 

Bayan karfe 12 na dare, na kasar ofishin shugaban kasar ya fitar da wata sanarwa ta shafin Facebook, inda wani bangare nasa ya ce, “Sakamakon yanayin rudani da aka samu a sakamakon vhanjin halin da wasu sassan sojojin kasar suka yi a wannan Juma’a… ana ci gaba da tattaunawa don dawo da martabar kasar da nutsuwa.”

 

 Ofishin Jakadancin Amurka ta gargadi amurkawa da su takaita zirga-zirgar su tare da sauraron rahotannin kafafen yada labarai na cikin gida.

Al’amuran ranar Juma’a sun biyo bayan nuna takaicin yadda gwamnati ta kasa shawo kan matsalar rashin tsaro da kungiyoyin ‘yan bindiga masu alaka da al-Qaida da IS suka haddasa.

 

 A ranar Litinin din da ta gabata ne aka yi wa ayarin motocin da ke dauke da kayan abinci da kayan masarufi zuwa garin Djibo da ke arewacin kasar, wanda yan ta’addan suka yi wa kewaye na tsawon shekaru. Sojoji 11 ne suka mutu, sannan an ce sama da fararen hula 50 sun bata.

 

 Lamarin da ya haifar da fargaba ga gwamnati, inda da dama daga cikin ‘yan kasar ke bayyana fargaba da shakku a shafukan sada zumunta.

 

 Paul Melly, wani manazarci na gidan Chatham House, wata cibiyar nazari da ke Landan, ya ce, “Burkinabe na jin tsoron ci gaba da yaduwar tashin hankalin masu jihadi.” (Reuters/NAN)

Daga:Firdausi Musa Dantsoho