Yan Bindiga Sun Sace Kwamishina A Nasarawa

0
18

 

Wasu ‘yan bindiga sun yi garkuwa da Kwamishinan Yada Labarai na Jihar Nasarawa, Yakubu Mohammed Lawal.

An ce an sace Lawal ne daga gidansa da ke karamar hukumar Nasarawa Eggon a ranar Litinin da daddare bayan an yi ta harbe-harbe.

Jami’in hulda da jama’a na rundunar ‘yan sandan jihar Nasarawa, DSP Ramhan Nansel, ya tabbatar da yin garkuwa da mutanen a ranar Talata.

Bayan samun labarin, Nansel ya ce rundunar ‘yan sandan jihar Nasarawa ta aika da jami’anta zuwa yankin domin ceto kwamishinan.

Jami’an ‘yan sandan da suka fito daga reshen Nasarawa Eggon sun yi tururuwa zuwa wurin domin tabbatar da cewa wanda abin ya shafa bai samu rauni ba.

Don haka, nan take kwamishinan ‘yan sanda, CP Adesina Soyemi, ya karawa ‘yan sandan hadin gwiwa da rundunar ‘yan sanda ta wayar tafi da gidanka, da sashin yaki da garkuwa da mutane, jami’an soji, ‘yan banga da mafarautan yankin.

“Da isowar wurin, an gano cewa ‘yan bindigar da ba a san ko su waye ba a lokacin da suke harbi ba kakkautawa, sun mamaye gidan wani Hon. Yakubu Lawal Addah sukayi awon gaba da shi da karfi zuwa wani wuri da ba a san inda yake ba,” in ji kakakin ‘yan sandan.

A cewar PPRO, ana ci gaba da gudanar da aikin bincike da ceto da rundunar hadin gwiwa karkashin jagorancin kwamandan yankin Akwanga Halliru Aliyu domin ceto wanda lamarin ya shafa tare da cafke wadanda suka aikata laifin.

A nasa bangaren, CP ya roki jama’a da su baiwa rundunar ‘yan sandan jihar bayanai masu amfani da za su kai ga ceto wanda aka kashe ko kuma a kama wadanda ake zargin.

Daga Firdausi Musa Dantsoho